Байрамныҥ ачылтазы оноҥ ары Ӱредӱчиниҥ јылына белетелген јаркынду театрал кӧргӱзӱле улалып тӱгенди.
Фестивальдиҥ программазына чурана ойноочылардыҥ, частушка-кожоҥдордыҥ, скоморохтордыҥ конкурстары, горницаныҥ, устардыҥ эдимдериниҥ кӧрӱлери, «Вышитая карта Республики Алтай» проектиҥ, балдардыҥ стол ӱстинде ойноор национальный «Карчага-Ястреб» ойынныҥ презентациялары, албатылык узаныштыҥ башка-башка бӱдӱмдериниҥ ӱредӱлик-класстары, јурукчылардыҥ плэнер техника аайынча јуранары, спорт маргаандар, ойын-концерт ле оноҥ до ӧскӧлӧри кийдирилген.
«Вышитая карта Республики Алтай» кӧрӱ Улаганныҥ тӱӱки-этнографиялык «Пазырык» музейдиҥ ишчизи О.Г. Манышеваныҥ шӱӱлтези аайынча јазалган. Конкурстыҥ ээжизиле болзо, кажы ла аймактыҥ улузы бойлорыныҥ кичӱ тӧрӧлиниҥ картазын чӱмдеп кӧктӧп, кееркедер керек. Кийис базарыныҥ узы А.Н. Тадышева тӱктеҥ јердиҥ текезин, чакы ла чоокыр ат базып, картаны јарандырган. Кӧрӧӧчилер Алтай Республиканыҥ бӱткӱл этире чогулган картазын јилбиркеп ајыктагылап, Улаган аймактыҥ эпчил эпшилери бӱдӱрген ижин аҥылап турдылар. Ольга Геннадьевнаныҥ јетиргениле болзо, карта эки айдыҥ туркунына јазалган. Бу ла конкурстыҥ «Вышитый герб Улаганского района» бӱдӱминде аймактыҥ тӧс библиотеказыныҥ библиографы Л.В. Енчинова турушты.
«Дом вести – не лапти плести» горницалардыҥ кӧрӱзи учун Акташтыҥ Культура туразыныҥ јааныныҥ ижин удурумга бӱдӱрип турган А.А. Левина ла балдардыҥ образцовый бијезиниҥ «Чейне» ӧмӧлиги (башкараачызы Н.И. Мадрашева) каруулу болдылар. Олор кирип-чыккандарды орус албатыныҥ јаҥжыгып калган аш-курсагыла, бије-кожоҥыла јылу уткугылап турдылар.
Чурана ойноочылардыҥ конкурсында аймактыҥ адын В.Ю. Кошев, частушка-кожоҥло аймактыҥ культура бӧлӱгиниҥ ишчилери корыдылар.
«Устардыҥ калазында» У.Г. Санинаныҥ, М.Р. Борисованыҥ, Т.Р. Тойдонованыҥ, Л.К. Топасованыҥ, Е.Т. Олчонованыҥ ла А.Н. Тадышеваныҥ иштери кӧргӱзӱге тургузылган болды.
Ӧткӱрмелдиҥ уч-турултазында албатылык фольклорный «Теле» ансамбль, вокально-эстрадный «Ар-Башкуш» ӧмӧлик «Играй гармонь, звени частушка!» конкурста турушканы учун, аҥылу диплом ло статуэткала темдектеттилер. Анайда ок, «Вышитая карта Республики Алтай» кӧрӱниҥ туружаачылары Лариса Владимировна Енчинова, Ольга Геннадьевна Манышева, Анюта Николаевна Тадышева Быйанду самараларла кайралдаттылар.
Байрамда канча кӱнге изӱ очоктоҥ ырабай, амтанду аш-курсак азып, эл-јонды азыраган культураныҥ ишчилери Любовь Исаковна Куюкова ла Светлана Владимировна Енчинованы мактап ийер керек. Слерге јерге батпас быйаныс!
Источник: Газета Улаганнын Солундары, автор - Л. Адыкаева
