Экинчи јер алган ветерандардыҥ «Эҥир јылдыс» ӧмӧлик база аҥылу ајару некейт. Нениҥ учун дезе, мында улу тайна-јааналар сценада орто јашту туружаачыларла теҥ-тай ойногондор.
«Эҥир јылдыстыҥ» баштапкы алтамдарын база эске алынып ийели: 1990 јылда Татьяна Андреевна Тадыкина јаан јаштулар амыралтага чыгып, айылдарында тегин отурбай, јуулыжып, куучындажып, кожоҥдоп турзын деп амадула «Мои года – мое богатсво» деп атту хор тӧзӧгӧн. Туружаачылар баштапкы ӧйлӧрдӧ балдардыҥ садында олорго берилген кыпта јуулыжар болгон. Башкараачызы мында јаан јаштуларга экинчи айлындый айалга тӧзӧӧргӧ албаданган. Јаантайын изӱ чай айактарга урулып, каткы, куучын «кайнап», гармонист Сергей Иванович Тадыкинниҥ јараш ӧйыны угулатан. Оноҥ ӧмӧликтиҥ башкараачызы јӱрӱмнеҥ ырап, јӱре берерде, хор тӧзӧӧчиниҥ адыла «Татьяна» деп аданган. Бир канча ӧйгӧ ӧмӧлик ижин токтодып, ойто 1993 јылда «Эҥир јылдыс» деп атту орныккан. Одус тӧрт јылдыҥ туркунына ӧмӧликтиҥ ас эмес туружаачылары бистиҥ ортобыста эмди јок. Ӧмӧликтиҥ башкараачылары болгондордыҥ ат-јолдорын темдектебеске болбос. Олор: Т.А. Тадыкина, Н.О. Енчинова, П.С. Ялбаева, О.С. Адыкаева, Р.Н. Бушулдаева. Эмди бу ӧмӧлик башка-башка конкурстарга туружып, Кан-Оозы, Оҥдой, Кош-Агаш аймактарда ла Улаганныҥ бастыра јурттарында ойын-концертиле болгон. Онойдо ок, Эл-Ойында, кайчылардыҥ Курултайында ла ӧскӧ дӧ ӧткӱрмелдерде эрчимдӱ туружат.
Ӧмӧликтиҥ репертуарында башка-башка ууламјыларлу кожоҥдор бар, је озодоҥ бери тайналарыс ла јааналарыс энчилеп келген телеҥит јаҥар бу ӧмӧликте аҥылу ӧзӱм алынган деп айтсабыс, јастыра болбос. О.И. Чуу, М.С. Тадышева, Н.О. Енчинова 2005 јылда Кан-Оозы аймакта Ойбок ӧзӧктӧ Улу јеҥӱниҥ 60 јылдыгына учурлай «Алтай јаҥар» кӧрӱде туружып, он бир команда ортозында 1-кы јер алган. Оныҥ кийнинде, 2007 јылда, Оҥдой аймакта «Јаҥар кожоҥ» маргаанда бу ла јаҥарчылар гран-при алган. Мындый једимдериле «Эҥир јылдыстыҥ» ады республика ичинде јайыла бергени јарт. 2007 јылда Алтай республикада «Алтай јаҥарлар» деп јуунты-диск чыгарылган. Мында эҥ талдама деп М.С. Тадышеваныҥ, О.И. Чууныҥ, О.М. Колянныҥ јаҥар кожоҥдоры киргени бу јаҥарчылардыҥ узы бийик болгонын кыйалтазы јогынаҥ керелейт.
Ветерандардыҥ ӧмӧликтериниҥ кажызы ла аймак ичинде танылу, јаркынду ла мактуулу. Олор керегинде бичиирге аҥылу ӧй керек ошкош. Бу конкурста турушкан бастыра јаан јашту артисттердиҥ јеҥил бијезин, коо, ару ӱнин кайкап, бастыра јанынаҥ јайалталу ла ойынчы болгоныла оморкоп ло сӱӱнип кӧрдис. Ойын-концерт дегенде, олор оорузын да ундуп, бастыра бойын сценага беринет. Адакыда, ветерандардыҥ ӧмӧликтерине мынаҥ да ары ӧзӱп ле ӧҥжӱп, кӧп јаҥы кожоҥдорыла эл-јонды сӱӱндирип турзын деп кӱӱнзейдис.
Л. Адыкаева
