Алтайыстыҥ јараш алтын сары кӱзи бистиҥ Улаган аймакка јаан солун экелди – бу ла ӱндерде Балыктујул јурттыҥ культурабайзыҥыныҥ сценазында баштапкы лакатап «Абайымныҥ кижи алганы» деп эҥбаштапкы алтай мюзикл аншлагла ӧтти! Сӱӱш керегинде каткылу мюзикл залда толо чогулган, ӧкпӧӧргӧн кӧрӧӧчилерге солун кӧрӱм ле бийик кӱӱн-тап сыйлаган.
Ады-јарлу бичиичи Аржан Ойинчинович Адаровтыҥ бичиген пьесазы аайынча тургузылган мюзиклдиҥ баш дирижеры Россия Федерацияныҥ Нерелӱ санатчызы, бистиҥ јерлежис Владимир Кончев, солисти Россия
Федерацияныҥ культуразыныҥ Нерелӱ ишчизи, јерлежис Надежда Егоровна Каланова болгоны ла ойноп турган артисттердиҥ тоозында бистиҥ јердиҥ јиттери туружып турганы кӧрӧӧчилерди тыҥ сӱӱндиргени кӧрӱмјилӱ ле оморкодулу болды. Тӧрӧл јерине айылдап келзе, Улу Улаган Алтайынаҥ кайралдар јогынаҥ канайып јанатан эди! Мынайып, мюзикл бир тынышла ӧткӧн кийнинеҥ, ӧкпӧӧриштӱ јылу айалгада «Улаган
аймактыҥ ӧзӱмине эрчимдӱ јӧмӧлтӧзи учун» деп I степеньдӱ медальла Владимир Егорович ле Надежда Егоровна кайралдаткан. Анайда ок, Алтай Республиканыҥ ла Улаган аймактыҥ культуразына јӧмӧлтӧзи учун аймактыҥ депутаттарыныҥ Совединиҥ Кӱндӱлӱ грамотазыла Эдуард Согоноков ло Быйанду Самаразыла Лия Санаа, Анастасия Каташева ла Андрей Чулунов темдектеткен.
«Бийик кеминде јылу уткуул учун јаан алкыш быйанымды тӧрӧл Улаган аймагымныҥ эл-јонына айдадым. Биске, артист улуска, слердиҥ јӧмӧлтӧ лӧ изӱ колчабыжу недеҥ де баалу! Чыккан јериме келеле, сыйным Надеждала кожо Тужаарга барып, чай ичкенис сӱрекей јакшы ла ийделӱ болгонын сезедим» - деп, Владимир Егорович кӱӱн-санаазыла ӱлешти.
Мынаҥ ары артисттерде тергеебистиҥ ӧскӧ аймактарыла јол-јорык улалар… Айдарда, ичкери ачык јолдор Слерге, бийик кайым учуш Слерге, кӧрӧӧчилердиҥ алкыш-быйаны Слерге!
Материал взят из газеты "Улаганнын солундары" (подготовила Ч. Манзырова)
