Бу јорык меге тоомјылу камыстыҥ турчызы болорго келишкен ле мениле кожо кыстардыҥ эпчилин Алтай Республиканыҥ эл политика ла јондык колбулу комитеттиҥ јааныныҥ ордынчызы Айана Ильинична Толкочекова, јаҥарчы, Јазулу јурттыҥ культура байзыҥыныҥ башкараачызы Любовь Тимофеевна Темдекова, Улаганныҥ баштамы школыныҥ директоры Айана Рафаиловна Тойдонова ла ады-јарлу тӱӱкичи Валерий Михайлович Адагызов талдаган. Камыстыҥ ижи кӱч ле неме деп кемге де јажыт эмес – ачынышту, тарынышту айдынган сӧстӧр кулакты кийнистеҥ кызыдып ла турды! Је канайдар база – конкурс ол конкурс… Јилбилӱ маргаанда кызу тартыжуда арт учында јеҥӱчил бойы ла кӧрӱне берет!
Кыстар је база јакшы ла белетенгилеген болтыр: Аленаныҥ јураган ла талада эдилген јараш куулгазынду јуруктары, ӱй улуска јазалган јӱзӱн-јӱӱр јарангыштары, ээлгирин кӧргӱскен бијези, Аиданыҥ јараш кеп-кийими, ончо кӧрӧӧчилерди амзаткан алама-шикири, јаҥарды јыҥырада эмдиги ӧйдиҥ кӱӱзине келиштире кожоҥдогоны, балдарла кожо бијелегени, Ольганыҥ јаҥарлаганы - бу ончозы кӧрӧӧчилерге тыҥ јараган.
Је эҥ ле камыстыҥ да, организаторлордыҥ да, залда отурган кӧрӧӧчилердиҥ де кӱӱнин бойына бактырган туружаачы Лилия болды! Бу јаражай эпчилин канайып кӧргӱспеди деер, улусты канайып каткыртпады деер!
Эпчил кыстыҥ маргаанына
Башкуш сууныҥ јарадынаҥ
Чейнелӱ ыйык эдегинеҥ
Паспарты јуртымнаҥ, баш ла болзын, једе кондым!
Алмат сӧӧктӱ Владимир ле Любовьтыҥ
Эҥ јаражай, эҥ јайалталу кызы мен Лилия болорым!!!
деп ӱлгер кептӱ угы-тӧзи керегинде куучындап јатса, «Тик-ток деп неме керектӱ ле неме болтыр» деп улусты каткыртып, балдарыла кожо эдип кӧктӧгӧн алтай наадайлар кӧргӱзип турза, ак-буурыл парикти кийе соголо алмыс болуп ойноп бараатса, торт јеҥдиртип, унчукпай туруп калганча «Кредиды кӧп болзо, уйкузы ас болор» деп чӱрче ле кеп сӧсти бойы сананып табыйза, ӧткӱн јараш ӱниле јаҥарлап, бойыныҥ чӱмдеген «Санааларым» деп кожоҥыла кажы ла кижиниҥ јӱрегине тийдире кожоҥдоп турза!
Мынайып, Гран-при Лилия Ухановага келишкен – Лилияныҥ бажына јап-јаҥы јараш алтай бӧрӱк кийдирилип, кышкыда корон соокто Паспартыда базып јӱрзе буды тоҥбос этире алтай ӧдӱк ле бойыныҥ кӱӱниле талдап, алтай каптал тон кӧктӧдип алатан сертификат сыйлалган.
Конкурстыҥ баштапкы јерин Алена Конушева ойноп алган –Аленага база ла јап-јараш алтай бычкак бӧрӱк ле кӧгӱспек кийдирилген.
Экинчи јер Аида Санинага једишкен – бу конкурстыҥ эҥ јиит туружаачызына баалу сыйлардаҥ башка, калада профессионал фотостудияда фотосессияга туружар арга берилген.
Ӱчинчи јерде Ольга Табаева болды – Ольгага база баалу сыйлар табыштырылган.
Алена Конушева: Коркышту јилбилӱ јакшы конкурс болды. Тӧрӧӧн-туугандардыҥ, кожо иштеп турган ӧмӧлигимниҥ, кӧрӱш-таныштардыҥ болужыла баштапкы јерди алдым. Бу конкурсты ӧткӱрген улуска јаан быйаным, сыйлаган сыйлары сӱрекей јакшы болды.
Лилия Уханова: бу конкурс јакшы бийик кеминде ӧткӧн деп айдадым, ончо туружаачылар јакшы белетенгилеген, је ас болгоны ачымчылу. Келер конкурста туружааччылар анаҥ да кӧп болзын деп кӱӱнзейдим. Бу конкурсты ӧткӱрген организаторлорго, сыйларла болушкан спонсорлорго јаан быйан. Анайда ок камыстыҥ ижин темдектеп ийерге турум, нениҥ учун дезе олордыҥ ижи эҥ ле кӱч иш. Конкурстыҥ бажынаҥ ала учына јетире кажы ла кыстыҥ эпчилин илелеерге база керек ле! Ончогорго су-кадык, ижигерде бийик једимдер кӱӱнзейдим. База бир коркышту сӱӱнгеним ол мениҥ тӧрӧӧн-туугандарым, нӧкӧрлӧрим, кӧрӱш-таныштарым, коллегаларым ончозы келгилеп јӧмӧгӧни. Јаан быйан ончоорго!
Аида Санина:
«Конкурсты јӧмӧгӧн, келип кӧргӧн улуска јаан быйаным айдадым. Анчада ла аҥылап быйаным јетирерге турган улус ол турушкан кыстар. Јӱрӱмде мындый ла јалтанбас ла эпчил болугар! Учурал келижип турарда спонсорлорысты адап, алкап салайын, олор – Айана Ильинична Толкочекова, Эмма Копеековна Тадыкина, Суркура Владиславовна Тадыкина, Виктория Викторовна Конушева, Аржан Иванович Тобоев, Ия Петровна ла Евгений Вячеславович Казанаковтор (т/б «Алтын-Казык»). Јаскыда келишсе, јол болзо, бу конкурсты республикан кемине чыгарарга албаданарыс» - деп, Мерген Тельденов кӱӱн-санаазыла ӱлешти.
«Алтайдыҥ эпчил кызы» деп конкурс мынайда тегиндӱ адалбаганын туружаачы кыстардыҥ эткен-тутканын, айткан-кӧргӱскенин бойымныҥ кӧзимле кӧрӧлӧ лӧ оҥдодым. Мында туружаачылардыҥ бӱдӱжи, бӱдӱми учурлу эмес, ада-ӧбӧкӧлӧриниҥ алдынаҥ бери јаҥдап келген чӱм-јаҥын билип оҥдоор, чын ла кандый ла айалганаҥ «уштулып» чыга берер, кандый ла уур-кӱч буудакты алтай согор эпчил кыс јеҥер керек болгоны - конкурстыҥ тӧс учуры! Айдарда, мындый конкурста туружар јииттер бар болгоны - бистиҥ тилис, чӱм-јаҥыс ундылбаганын недеҥ де чын керелейт! Мынаҥ ары бу конкурс ӧзӱм алынып, республикан кемине чыкса, Улаганныҥ адын бистиҥ јаражайлар анаҥ да бийик кӧдӱрер деп иженедис!
Автор Ч.Манзырова
