Отдел культуры,
молодежной политики и спорта

Информация о материале

Опубликовано: 09 января 2024

Кандый тымык эҥир турган, кандый јараш сӧстӧр айдылган…

«Алтайдыҥ эпчил кызы» деп јаражайлардыҥ конкурсы ӧткӧн амыраар кӱнде «јалт» этире ӧтти. Бу Улаган аймактыҥ кеендикти, узанышты ла спортто јондык бӱдӱмдерди элбедер тӧс јерди башкарган Мерген Тельденовтыҥ баштаҥкайыла башталган конкурс бежинчи катап ӧткӱрилип турганын темдектеер керек: эҥ ле баштап 2018 јылда Барнаул калада, ээчиде 2019 јылда Улаганда, анаҥ эки катап Кан-Оозында. Улайына ла концерттер болуп турганына ба, айса соок Улаган аймагыска јӱк арайдаҥ ла јылулар келерде, улус айыл-јуртында сыр ла иштенишке кире бергениле колбой бо, зал јык толо болбогоны ачымчылу болды! Је андый да болзо, јаражай туружаачыларысты јӧмӧп, кыйгы-кышкы, сыгыру тыҥ ла болгон! Анчада ла Чибит јурттаҥ јерлежин јӧмӧп, койу кӧчӧзин асканча, аш-курсагын јайганча келген «ооруучыларды» кӧрӧргӧ андый јакшы болды! Айла туружаачы кыстар да тӧрт лӧ болчок болгоны база кайкатты! Мындый јакшы сыйларлу конкурска бу бистиҥ кыстарыс не турушпас? Сценага чыгып, бойлорын не ченебес? Акыр, је бу кирезинеҥ куучынымды кирелендиреле, туружаачыларла слерди, кычыраачылар, таныштырып ийейин, олор:

Алена Конушева – 30 јашту, саал сӧӧктӱ, угы-тӧзи Балыктујулдаҥ, Улаганда балдардыҥ кеендигиниҥ школында јуранарыныҥ ӱредӱчизи ле балдардыҥ «Ырыс» садында кӱӱниҥ башкараачызы болуп иштейт;

Аида Санина – 20 јашту, саал сӧӧктӱ, Чибит јурттаҥ, Новосибирск калада стоматологический клиникада эмчи болуп иштейт;

Ольга Табаева – 27 јашту, кӧбӧк сӧӧктӱ, Саратан јурттаҥ, «Виктория» кафеде иштейт;

Лилия Уханова – 31 јашту, алмат сӧӧктӱ, Паспартыныҥ орто ӱредӱлӱ школында химияныҥ ӱредӱчизи ле завуч болуп иштейт.

Просмотров: 249